ချီးမွမ်းထောပနာခြင်းအပေါင်းသည် အလ္လာဟ်အရှင်မြတ်အတွက်သာဖြစ်ပါသည်။
.
ဒီနှစ်ဟစ်ဂ်ျရီ ၁၄၃၂ မှာအီဒ်ဒွလ်အဒ်ွဟာအခါသမယကို ရောက်ခဲ့ပြီးပါပြီ။ မွတ်စလင်မ်များမှ မရှိသူဆင်းရဲသားများအတွက် သားကောင်များကို စွန့်လွှတ်လှူတန်းမျှဝေပေးခဲ့ကြသည်။ ဤကုရ်ဗာနီသည် ယစ်ပူဇော်ခြင်းလည်းမဟုတ်၊ အချို့နိုင်ငံများကဲ့သို့ အမျိုးသားများ မိမိခွန်အားသန်စွမ်းကြောင်းကြွားဝါရန် သားကောင်ကိုသတ်ဖြတ်သည်လည်းမဟုတ်၊ အပျော်အမဲလိုက်ချင်းလည်းမဟုတ်ပါ။
.
လပေါင်းများစွာ၊ နှစ်နှင့်ချီ၍ နွမ်းပါး ငတ်မွတ်နေသဖြင့် ဟင်းလျာကောင်းများတမ်းတနေသူ ဆင်းရဲသားများအတွက် မိမိတို့ ငွေ၊ အချိန်၊ ခွန်အားများရင်းကာ တစ်နှစ်တစ်ခေါက်စွန့်လွှတ်လှူတန်းခြင်းသာဖြစ်ပါသည်။
.
အကယ်၍ ဘာသာတစ်ခုက နောက်ဘာသာတစ်ခုကို မိမိတို့အယူဝါဒရှူထောင့်မှကြည့်လျှင် ဘယ်သောအခါမှ ထိုစွန့်လွှတ်မှုကိုနားလည်နိုင်မည်မဟုတ်။ မိမိတို့ရှူထောင့်မှကြည့်ပြီး ထိုကုရ်ဗာနီကိုရှူံ့ချဝေဖန်ပြစ်တင်သူများလည်းများစွာရှိကြသည်။ မည်သို့ပင်ပြစ်တင်နေကြသော်လည်း မွတ်စလင်မ်အိမ်နီးချင်းမှ အသားတစ်ထုတ်ကိုတော့နှစ်တိုင်းမျှော်ခဲ့သူများ၊ အသားရပြီး ဒီကနေ့ဈေးဖိုးတော့သက်သာပြီ၊ဟင်းကောင်းတစ်မယ်စားရပြီဟု ဝမ်းသာသောအိမ်များစွာ မြန်မာနိုင်ငံ၌ရှိကြသည်။
.
ဆင်းရဲနွမ်းပါးမှုနှုန်း တစ်နှစ်ထက်တစ်နှစ်မြင့်တက်လာလေ ဆင်းရဲသားဦးရေလည်းတိုး၍သာလာလေဖြစ်နေပါသည်။ ကုရ်ဗာနီရက်များကျရောက်သည့်နေ့များတွင် မွတ်စလင်မ်များ၏ အိမ်တခါးပေါက်ဝ၊ ခြံဝတို့တွင်အသားအလှုရရန် မျက်နှာငယ်လေးနှင့်စောင့်မျှော်နေကြသူများ၊ တိုးဝှေ့ပြီးအသားထုတ်ရအောင်ယူသောသူများ၊ ရပြီးသူတွေကနောက်တစ်ခေါက် ရအောင်ကြိုးစားကြသူများ၊ လူကြီး၊ လူငယ်၊ ကလေးများမှအစကုရ်ဗာနီသားကို တောင်းရမ်းကြသည်။ ထိုသို့အိမ်တိုင်ယာရောက်လာတောင်းကြသော ဆင်းရဲသားများမှာကျွန်ုပ်တို့နှင့် တစ်နိုင်ငံတည်းမွေးကြသော မြန်မာလူမျိုးမောင်နှမအများစုဖြစ်ကြပြီး တစ်နှစ်ထက်တစ်နှစ်တိုး၍လာပါသည်။ ၎င်းဆင်းရဲသားများသည် ဩငါတို့ကိုဒီလို တစ်နှစ်တစ်ခေါက် အသားလေးစားရအောင်လှုမဲ့သူတောင်မရှိကြပါလားဟု စိတ်ညှိုးနွမ်းကြရှာသည်။
.
မြန်မာသမိုင်းတလျှောက် မွတ်စလင်မ်ကို မွတ်စလင်မ်ဟုမခေါ်ဘဲ ခါးသီးစေသော ကုလား ဟူသောအခေါ်၊ လူမျိုးရေးဘာသာရေးမှာ ခွဲခြားဆက်ဆံမှုတို့သည် မျိုးဆက်ပေါင်းများစွာခံခဲ့ရပြီးဖြစ်သည်။ ဤသည်ကုလသမဂ္ဂ၏ ပြဌာန်းထားသော လူ့အခွင့်အရေးကို နားမလည်ကြ၍ တစ်ကြောင်း၊ မေတ္တာတရားများမေ့လျှော့သွားကြ၍လည်းကောင်းဖြစ်နိုင်ပါသည်။
.
ကုရ်ဗာနီကို ကုလားများနွားသတ်သည်ဟု ပြောကြပါသည်။ ရှိပါစေတော့။ ထိုသို့ပြောဆိုသူတို့မှာ မွတ်စလင်မ်တို့၏ စွန့်လွှတ်မှုစေတနာနှင့် အောက်ပါကျမ်းမြတ်ကုရ်အာန်ပါအမိန့်တော်များကိုနားမလည်ကြလို့ပင်ဖြစ်သည်။
.
အသင်တို့သည် ၎င်းတို့(၏အသား)အနက်မှ မိမိတို့ကိုယ်တိုင်လည်း စားသုံးကြလေကုန်။ (လက်ဖြန့်တောင်းခံခြင်း မပြုဘဲ) ရောင့်ရဲတင်းတိမ်(မှုဖြင့်သိက္ခာစောင့်စည်း)သူအား လည်းကောင်း၊ (သိက္ခာမစောင့်စည်းနိုင်ဘဲဖွင့်ဟ) တောင်းရမ်းသူအားလည်းကောင်း၊ ကျွေးမွေးကြလေကုန်။ ( ကုရ်အာန်၂၂း၃၆)
.
အလ္လာဟ်အရှင်မြတ် အထံတော်သို့ ယင်းကုရ်ဗာနီသားကောင်တို့၏ အသားများသည် အလျင်းရောက်ရှိသည် မဟုတ်ပေ။ ထိုနည်းတူစွာ ယင်းကုရ်ဗာနီ သားကောင်တို့၏ အသွေးများသည်လည်း အလျင်းရောက်ရှိသည် မဟုတ်ပေ။ စင်စစ် အသင်တို့၏ ရိုသေလေးမြတ်မှု၊ အမိန့်တော်ကိုရိုသေလိုက်နာမှု၊ ကောင်းမြတ်သော အကျင့်သီလသည်သာလျှင်ထိုအရှင်မြတ် အထံတော်သို့ ရောက်ရှိပေသည်။ ထိုအရှင်မြတ်သည် ယင်းကုရ်ဗာနီ သားကောင်များကို အသင်တို့၏လက်အောက်ခံများ ပြုလုပ်ထားတော်မူပေသည်။ ကုရ်အာန် (၂၂း၃၇)
.
ထို့ကြောင့် မွတ်စလင်မ်များသည် လူတစ်ဘက်သားအား ကျောသားရင်သားမခွဲခြားဘဲ လူမျိူးမရွေး ဘာသာမရွေး မရှိဆင်းရဲသားများကို တန်းတူ လှူတန်းခဲ့ကြသည်။ မွတ်စ်လင်မ်တို့သည် မိမိတို့တတ်နိုင်သလောက်ငွေနှင့် သားကောင်များကိုဝယ်ယူကုရ်ဘာနီပြုလုပ်ပြီး ရက်ရက် ရောရောပေးကမ်းလှူတန်းကြသည်မှာ တစ်ကမ္ဘာလုံးမှမွတ်စ်လင်မ်မောင်နှမများ၏ တူညီသောစိတ်စေတနာများဖြစ်ပါသည်။
.
ကမ္ဘာပေါ်တွင် လူချမ်းသာ၊ ဆင်းရဲတို့ရှိချင်းသည် ချမ်းသာသူတို့ ပိုင်ဆိုင်မှုများကိုသာဖက်တွယ်မနေဘဲ ကိုယ်ကျိုးကိုစွန့်၍ လူအများအကျိုးဆောင်ရွက်ပေးခြင်း၊ ဆင်းရဲသူတို့မှာ ငတ်မွတ်ဆာလောင်နေချိန် မိမိတို့အား လူအချင်းချင်းမှ မျှဝေလှူတန်းရာမှ အလ္လာဟ်အရှင်မြတ်၏ ကျေးဇူးတော်ကိုသတိရခြင်း၊ လူသားချင်းအပေါ်စာနာမှုထားခြင်းတို့သည် မွန်မြတ်သောအလုပ်များပင်တည်း။
.
အကယ်၍တစ်ဦးတစ်ယောက်၏ ဆန္ဒအတိုင်း ကမ္ဘာပေါ်မှာ ချမ်းသာဆင်းရဲမရှိအားလုံးတန်းတူသာရှိနေမည်ဆိုလျှင်၊ လူ ဟူသောလူသားသည် လွယ်ကူမှုအပေါ်တန်ဖိုးထားတတ်ခြင်းကင်း၍၊ ငါ ဟူသောတကိုယ်ကောင်းဆန်မှု၊ ကျေးဇူးကန်းမှုတို့သည် ဆထက်တပိုး ပို၍တိုးများလာမည်။ ပြစ်မှုဒုစရိုက်များကျူးလွန်နေကြသူများသည် ဆင်ခြင်တုံတရားခေါင်းပါး၍ အလိမ္မာကင်းသောသူများဖြစ်ကြသည်။ အမုန်းတရားနှင့် ကျင်လည်နေခြင်းသည်ရောဂါဆိုး၏ ဝေဒနာကိုဝယ်ယူခံစားနေသူနှင့်တူသည်။
.
ဧကန်အမှန်အလ္လာဟ် အရှင်မြတ်သည် မည်သည့်သွေဖည်ငြင်းပယ်သောသစ္စာမဲ့သူကိုမျှ နှစ်သက်တော်မူသည်မဟုတ်ပေ။
ကုရ်အာန် (၂၂း၃၈)
.
တစ်ဆူတည်းသော အလ္လာဟ်ရှင်မြတ်သည် အစစအရာရာကို သိမြင်တော်မူသည်။ ထို့ကြောင့်စကြာဝဠာ၌ ရှိရှိသမျှတို့ကို မည်သို့မည်ပုံဖန်ဆင်းရမည်ကို အသိဆုံးဖြစ်သည်။ အရှင်မြတ်၏ တန်ခိုး၊ ဖန်ဆင်းမှုအဆင့်ဆင့်တို့ကို တော်ယုံဉာဏ်အမြှော်အမြင်ဗဟုသုတနှင့် လိုက်မှီ နားလည်ရန်မလွယ်ပါ။ မိမိတို့စိတ်နှလုံးများကို ဖြူစင်အောင်အထပ်ထပ်ဆေးကျောပြီး မေတ္တာတရားအစစ်အမှန်ရှိမှသာလျှင် နားလည်နိုင်လိမ့်မည်။
.
ငတ်မွတ်ခေါင်းပါးနေသော မရှိဆင်းရဲသားမြောက်များစွာတို့သည်နှစ်စဉ် နံနက်ဝေလီဝေလင်းအချိန်မှစ၍ စုအုံလို့ကုရ်ဗာနီသားကို အလုအယက်တောင်းနေကြသောမြင်ကွင်းမှာ အလ္လာဟ်ရှင်မြတ်၏ ညွှန်ကြားချက်များသည်ချွင်းချက်မရှိအမြဲမှန်ကန်နေကြောင်း သက်သေသာတကတစ်ရပ်ဖြစ်သည်။
.
ရွှင်လန်းကြပါစေ။
No comments:
Post a Comment